【臨時決鬥 / 古天樂 / 賀歲片】2025農曆新年賀歲電影《臨時決鬥》，由掌《臨時劫案》導演麥啟光執導，古天樂、梁詠琪（GiGi）、王丹妮、周秀娜、胡子彤、張文傑、陳湛文、楊詩敏（蝦頭）、伍允龍、喬靖夫、王尹菁、王頌茵、陳獻略、陳慧敏、陳楨怡及吳梓熙等演出。
電影在日前煞科，台前幕後趁煞科時刻齊集擂台大合照，古天樂更成為演員的打卡對象，蝦頭要古仔攬攬合照，陳湛文就握手道別，古天樂當然有求必應。
臨時決鬥丨古天樂：開心順利完成
古天樂表示：「好開心順利完成賀歲片《臨時決鬥》拍攝，見到演員好努力演出精彩嘅動作場面，加上充滿喜劇節奏的故事，相信係一齣娛樂性豐富的賀歲好戲。」
至於梁詠琪說：「同丹妮、秀娜、蝦頭一齊練拳準備呢部戲都好開心，識到佢哋好開心，相隔多年再同古仔合作感覺好新鮮，今次再次同佢做夫妻，感覺幾得意，好親切感覺。我拍第一部戲時已認識導演，當時佢幫我試鏡，識咗咁多年第一次合作，多謝導演畀我好大發揮空間。」
另外，王丹妮稱：「內心一直好想拍一次喜劇，今次終於願夢成真，有機會同全新演員組合合作，喺佢哋身上學到好多拍喜劇的技巧。同埋有某幾日連續拍攝完泰拳動作，嗰幾個朝早起身都周身肌肉酸痛，但成功做到拍攝要求嘅動作之後，滿足嘅感覺真係難以形容。今次對角色係一個挑戰，對王丹妮亦係一個挑戰，經此一役自己成長咗，更加無畏無懼，係好寶貴嘅拍攝體驗。」
臨時決鬥丨周秀娜與王丹妮對打
此外，周秀娜表示：「對於我來講係新鮮刺激拍攝過程，特別係我同丹妮的一場拳擊比賽，整個過程好滿足，我哋好少用到替身，所以好有成功感，開心滿足。」
而胡子彤說：「雖然拍攝現場好緊湊，但我哋每個人付出都好多，很期待看到齣戲，今次是首次自己較多喜劇成份的電影，而拍攝過程好好玩，整件事很享受。」張文傑稱：「今次開心可以同一班知己一齊拍戲，知己又經常請我哋食嘢，希望大家會鍾意部戲，俾一個開心的新年大家，到時記得入場睇我Ger古大戰。」
同時，蝦頭說：「第一次同GiGi、丹妮、娜姐有動作片段，好多驚喜，第一次合作好有火花，好多傾偈時刻，新一年希望畀到大家好好的能量，同好熱血的感覺。」
而陳湛文說：「睇吓兩個美女，為咗爭我呢個咁嘅男仔打擂台，唔好為咗我打嘞﹗」王頌茵說：「難得可以同GiGi、王丹妮、蝦頭等一齊合作，可以一次過實現晒我多個願望。」
註：劇照為電影公司版權所有。
原文網址：https://topick.hket.com/article/3865256/%E8%B3%80%E6%AD%B3%E7%89%872025%E4%B8%A8%E3%80%8A%E8%87%A8%E6%99%82%E6%B1%BA%E9%AC%A5%E3%80%8B%E7%85%9E%E7%A7%91%E5%8F%A4%E5%A4%A9%E6%A8%82%E6%88%90%E6%89%93%E5%8D%A1%E5%B0%8D%E8%B1%A1%E3%80%80%E8%A7%92%E8%89%B2%E4%BA%BA%E7%89%A9%E9%80%A0%E5%9E%8B%E9%A6%96%E5%BA%A6%E6%9B%9D%E5%85%89